Na uma le mavaega a le alii matua o Pili i ona atalii, ona taitasi lea o le tama ma lau i le vaega o Upolu (po o Manono) ua tofia i ai.  Sa tausia pea i nisi tausaga lo latou fealofani ma le filemu i le va o o latou itumalo.

Ae peitai, na maliu loa lo latou tama, ona amata lea ona tauaimisa i le taufai fia faalauteleina o laueleele o latou itumalo.  Aua e le’i iloga ona faasinoina ni tuaoi i le mavaega a Pili, o le ala lea ua fetaufaoai ai.  Na vave on tupu le taua i le va o Saga ma Ana.  O le taua muamua na toilalo leaga ai Ana, ona tauto ai lea o le a taui ma sui.

O le mea lea na ia alu ai i lona uso o Tua ua tagi i ai i lona puapuaga.  Na vaai atu Tua i le foafoa o le ulu o Ana ma le lava toto o ona mata i tu’i a Saga, ona ia fai mai lea ua lelei o le a ia fesoasoani mai ia te ia pe a toe tupu se faalavelave.

E le’i leva atu, ae tupu loa le taua.  Ua au Atua ma Aana e faasaga ia Tuamasaga ma Manono.  Sa tau pea lenei taua i nisi masina, e toatele na maliliu i itutaua uma e lua.  Na i’u faaletonu lena taua, e le’i iloga se itu ua manumalo, ae ua toe iu ina maua le filemu.  O le taua lena ua ta’ua o le “Taua o le au uso.”

Talu mai ai lava lena ulua’i taua, e au faatasi pea Atua ma Aana e faasaga ia Tuamasaga ma Manono ma se vaega tele o Savaii.  E le’i tele ni tausaga na mavae talu mai lena ulua’i faiga Malo i Upolu, ae osofia mai loa Samoa e Toga, sa taitai mai ai le alii o Asoaitu, ona avea lea o le mamalu o e na pulea Upolu ua toilalo lava.

O ona po o Pili ma ona atalii, sa soifua latou i le va o tausaga o le 850 ma le 950.  O Fitiaumua sa pule i Samoa i luma atu o na tausaga.  A o tua mai o le 950 na o mai ai Toga i Samoa ma nofoia ai sei’a oo i le 1250, ona tulia ese ai lea mai Samoa i Sisisfo e Tuna ma Fata, ao Fuaautoa na ia tulia ese Toga mai Tutuila.

O ona po o Pili, ai lava na o Samoa i Sisifo sa faasino i ai le igoa Samoa.  I le ma lea, o le igoa “tui” – tupu – o le upu Toga, o lea ua i ai le manatu, o ao ia o Tuiaana ma Tuiatua, na aumaia e Asoaitu le ulua’i Tuitoga.

Ua tatou maua foi, e tele tausaga sa avea ai Manu’a ma laumua o se malo tele faaPolenesia, sa aofia i ai e le gata ia Samoa uma, ao le tele foi o isi atunuu o paepae mai.  O se malo tele faapena, sa le mafai on pulea lelei e se tupu e toatasi.  O le mea lea, tatou te iloa gofie ai, na tauauau malie atu ina fai lava malo o isi vaega o lena malo tele, a ua le tasi i Manu’a.

Ua tatou maua i le Tala faasolopito o Toga, fai mai o “Ahoeitu” o le alii Togatapu, o ia na muamua ona tetee e le toe faitaulaga ia Fitiaumua.  Ona avea al lea o ia ma ulua’i Tuitoga.  Po o le tausaga e 950 na tupu ai lea mea.  O le tupu lava foi lea na ia faamalosia tagata o Niue, Uea, Futuna ma Rotuma ia faitaulaga atu ia te ia i tausaga uma.

Na mavae ni nai tausaga, ona faatoilaloina lea o Samoa e lena lava alii o Asoaitu, ma ua nofoia ai.  Ae ui i lea, e leai se tala ua maua faapea na osofia Manu’a e tagata Toga.

Fai mai o le ta’u faatoga o le igoa o Samoa (Haamoa) na faatoa faaaoga muamua lava ina ua faatoilaloina Samoa e Asoaitu.  Ao luma atu o na aso, sa ta’u lava latou e tusa ma le motu o lo o mau ai, faapea: tagata Upolu, tagata Savaii, po o tagata Tutuila.  O lea la, o le igoa Haamoa sa le aofia ai motu o Manu’a.

Sa tu pea le malo o Toga i tausga pe 500, o le amata mai lea i le 950 e oo i le 1450 (po o le amata mai ia Ahoeaitu e oo ia Takalaua).  O Tupu Toga muamua sa pule i Samoa, e le taumate o alii agalelei ma le atamamai aua sa lelei a latou faiga i tagata Samoa, e seasea ai ona lagona e le toatele le fia tete’e atu o Tuitoga.  Ae ui i lea, ua oo mai i le 1250, ua avea Talaaifeii (Talakai faiki) ma Tuitoga, ona ese lea o le tulaga ua oo i ai.  O le tupu lea, fai mai o le toa malosi toe loto fefete, e faalealofa ma e faasaua, aemaise lava i tagata Samoa.

O le mea moni lea, ua avea lona saua ma mea e soosoo malie ai Samoa se’ia oo ina aufaatasi ma laga loa e pei o le tagata e toatasi ia tetee Talaaifeii.

O lena taua tele, o le tasi lea o mea pito taua ma le lagona loloto ia Samoa, e ui ina ua tele tausaga talu ai, ae le galo lava.  O le taua la lena, le taua o Toga – o le ulua’i mea faailogaina mautinoa lea, o le ma lea, na maua ai ia Samoa le faasologa tupu fou o le Malietoa.

Ia manuia lau faasausauga Samoa.