Toe faatalofa atu i le mamalu o Samoa atoa e amata mai Saua se’ia pa’ia le Fafa o Saualii.  O se tasi lenei o tala ta’uta’ua i le Tala Faasolopito o Samoa.  Usi mai loa lau faafofoga.

O Feepo le tupuaga o le Malietoa, e to’atolu lana fanau, e toalua tama ma le teine.  O Malalatea le igoa o le tama matua ma le tama lona lua o Atiogie lona igoa.  O Sina le igoa o le teine.  Na nofotane Sina i le Tuimanu’a.  Na oo i le tasi aso, ona poloa’i mai lea o Sina  i lona tuagane o Malalatea se’i asiasi atu ia te ia i Manu’a.  Na alu Malalatea, ma tau atu o fai le alofisa o alii.  Na toatama’i Tuimanu’a ina ua soli atu le alofisa e le taulealea ma ua fai ai lana poloaiga ia fasioti Malalatea.  Ae ui i lea, na mafai e Sina ona faasaoina lona tuagane.

Ua taupule nei Sina ma Malalatea o le a la foi mai i Aele lo la aiga moni i Faleata (Upolu).  Na silafia e Tuimanu’a ua sauni lona faletua o le a alu, ona fai lea i ai ia avatu lona Faleula i Upolu.  O le ala lena na oo mai ai le Faleula o Tuimanu’a ia Malietoa.

Ua le toe maua nisi tala e uiga ia Malalatea, e le taumate na vave maliu ina ua foi mai ma Sina mai Manu’a, ao lo o i ai ona suli o soifua i aso nei i le nuu o Salailua (Savaii).  Ona avea ai lea o Atiogie lona lua o atalii o Feepo e sui i lona tama ua fai ma matai o le aiga. 

O tala nei e lua, ua faaalia ai uiga o Atiogie, e le na o lona toa ma loto tele, ae loto alofa tele foi i lona tama ua matua, tauaso ma pipili.

O aso o Samoa anamua sa le tele ni faalavelave, e mafuli lava i faafiafiaga ma faaagatama i ituaiga o taaloga eseese.  O le tasi o taaloga e tumu i ai maimoaga o le taaloga lea sa tauva i ai alo o alii e faaalia ai le poto ma le loto tele.  E faapea sa i ai i Falefa malae lauiloa e tolu e masani ona fai ai ia taaloga.  O Amouta, Amotai ma Moamoa.  A malo se tasi i le malae muamua, ona toe taalo lea i le malae ona lua, a o le toe malae ma le faaiuga o le malae i Moamoa.  Ua mafua mai ai le alagaupu “E SAO MAI LE AMOUTA, AE TALI LE AMOTAI, FAI FOI O LEA, A’O LE TOE ASO I MOAMOA.”  O lona uiga, a sao mai le tagata taalo ua manu’a i Amouta, e tatau lava ona feagai ma le isi i Amotai, a o lo o totoe pea foi Moamoa.

O na taaloga e matua solo maimoa i ai tagata e toatele o e mamao ma lata mai e fia matamata i taufeta’aiga e fai i lapalapa.

Ua leva ona mana’o Atiogie e fia auai i lea taaloga a tamatane.  Ma i’u lava ina oo mai le aso e faaali ai lona mata faiva.  E le’i ta’uina i lona tama, a ua alu lava ia i Falefa i le mea e fai ai le taamilosaga.  Na le fo’i mai le tama i le afiafi, ona masalosalo ai lea o lona tama, aua ua na iloa o aso ia o faigamea i Falefa.  Ua na iloa foi le mana’o faalilo o lona atalii pele e fia iloilo lona malosi ma isi tamaalii.  Na i’u lava ina fesili le toeaina po o fea Atiogie.  Na ta’u ane ua alu i Falefa, ona ia nofo ai lea ua le tautala a ua talotalo ia manuia le taaloga ma ia malo si ona atalii.

Na ia maua mai le tala i le afiafi, ua faiaina uma tagata ia Atiogie i Amouta ma Amotai, ao le toe taaloga i le malae i Moamoa ua tuu lea mo taeao.  Na faalogo atu Feepo i ia tala, ona atili ai lea ona faamalosi ana tatalo ma ua fai ana folafolaga i taulaga tatau e fai i le Fee le atua o lona aiga, pe afai e malo lona atalii i le toe taaloga.

Talofa ia Feepo pe ana se’i pupula se’i vaai i le toe taaloga.  Ae paga lea, e tauaso toe pipili si toeaina, ua le mafai ai ona aveina i le malae i Falefa.  O lea na onosa’i ai ma tapuai atu ai i Faleata.

Ua tauau malie mai le afiafi o lona tolu o aso taalo.  Ua i’u ina taunuu mai le avetala ua leva ona faatali i ai le toeaina.  Fai mai le tala a le tamaloa (avetala) ua toe malo foi Atiogie, ua faiaina uma lava tagata taaalo ia te ia.  Ona faasolo ai lea o ana tala i le toe tauiviga na fai i le va o Atiogie ma Salevaonono le alo o Leuteleleiite i Falefa.  Fai mai o le taaloga lava lea na ese ona o le tau fai malolosi o tama.  Pe tusa ma le afe ma afe tagata ua naunau i le fia iloa po o ai o le a malo i lenei tauiviga mata’ina tele.

O taulelea foi e tutusa lelei lo la matutua, tutusa o la fuaitino ma malolosi uma, ua fetaui lelei lava le la paga.  Na fai fai le taaloga, malolo, toe fai.  Ua taufai tutusa lava le popoto ua iloa gata po o le a le iuga.  Ae ui i lea, fai mai na lagona e Atiogie, ua le tutusa le malolosi o ta na ia lavea ai, ua tauau ina mama ona ia iloa ai lea ua tauau ina vaivai Salevaonono.  Ona faamalosi ai lea o le taaalo a Atiogie.  Na faafuase’i ona sii lana lapalapa, ae ta tofiulu ifo tonu i le ulu o Salevaonono ma lona malosi atoa.  Ua vaaia e le aumaimoa ua niva Salevaonono ma ua le tutu lelei ona vae ma ua oo ina pa’u i lalo.  Ona i’u ai lea o le taaloga, ua manumalo Atiogie.  O lea faagatama na pogai mai ai isi alagaupu faasamo nei e tolu:

“UA PATIPATI TAOTO E PEI O FEEPO” ( ona e taotooto le toeaina ma patipati i lona fiafia ona ua maua mai tala ua manumalo lona atalii o Atioge)

UA TUSA TAUAU” ( ona o le tutusa lelei o le malolosi o taaalo a Atiogie ma Salevaonono)

UA TAIA LE ULU, SA’E LE VAE” ( ona o le lavea o Salevaonono i le ta a Atiogie na le tutu lelei ai ona vae ma o’o ai ina pa’u i lalo)

O LE AGALELEI O ATIOGIE I LONA TAMA

Na iloa e Atiogie e fia ai ufi lona tama.  Ona ia usupo lea i le taeao o le aso Gafua ua aumai ufi.  Na tuu mai le ato ufi i le fale ae alu Atiogie.  Ona tagotago atu lea o le toeaina ua faitau ufi o i ai i totonu o le ato ma ia iloa e fitu ufi.  E leai sana upu na fai ae na ona ia faatalitali.  Ae ua sauni mai e lona atalii e tofu lava le aso ma le ufi e faalifu.  Ua faapelepele uma lava ufi ma le toeaina, ae na te le’i aina se ufi.  Ona lagona ai lea e le toeaina lona manuia ma le faafetai ina ua ia maua se atalii tautua lelei ma le loto alofa.  O le mea lea na ia faamanuia ai i lona atalii ma folafola i ai, o lea ia maua se fanau se to’afitu, e ono tama ma le teine e toatasi.  O le mea lea ua taua ai foi suli o Atiogie o le “Gafa o le Ufi“.  O igoa nei o le fanau e to’afitu: Lealali, Savea, Tuna, Fata, Veatauia, Leimuli ma le teine o Atiatigie.

O Savea lea sa avea ma ulua’i Malietoa.  Ao ona uso o Tuna ma Fata, o toa ia na tauina le taua ma Toga ma tulia ese Toga mai Samoa.  Na uma lena taua, ona la faatuina lea o le Malo i Tuamasaga.

tala e soso’o ai: O le taua ma Toga

Ia manuia lau faasausauga Samoa

 

 

6 Comments

  1. Lealali Faamau Palelei Niko Tautaiolefue

    O Lealali le atalii o Leationie, na tofi i Leulumoega ma lona Tumua, o loo suli o Lealali i Leulumoega.
    O Salevaogoo ma sausi. O aiga tetele foi ia o loo iai i Leulumoega.
    O suli o Lealali.
    O tofiga na faia e Leationie, O Lealali, o Leulumoega ma lona Tumua, O Tuna e nofo i Faleata ma lona Ituau Malosi, O Fata na tea i Safata ma lona Alataua, ae nofo Savea i le suafa Malietoa.

    Reply
  2. Lealali Faamau Palelei Niko Tautaiolefue

    Sina le afafine o Feepo.
    Manatua foi Sina le afafine o Feepo, lea na usu mai iai le Tuimanua,e le alo ai le tamaitai, ona toe foi mai lea o Sina i lona aiga i Fogaa i Faleula.
    Ona usu mai lea iai o Utuma’ava’ava Faleloa ia Sina,ona faee ai lea o le gafa,
    Tupaia,Leaso, Tulia, ma Leaunai, ma le teine o Sinalemamaia.
    Ona usu mai lea o Nuulafi o Tafaigata ia Sinalemamaia, faaee le gafa o Leoo.
    O Leoo lea, o ia lea na uluai nofoia le suafa Laupa i Faleula, i tofiga a Malietoa,
    Uitualagi.

    Reply
  3. Lealali Niko

    Suafa Laupa i Faleula.
    Manatua o le suafa Laupa, e afua mai i le suafa Feepo ma lana fanau, Malalatea, Leationie, ma le teine o Sina.
    O Sina la e tupuga mai ai le suafa Laupa i Faleula.
    O le afuaga mai la o le gafa mai ia Sinalemamaia le alo o Sina le afafine o Feepo, Laupa Leoo, Laupa Alofitai, Laupa Tautai, Laupa Tulimatala, Feepo Mauga, Laupa Vaivai, Laupa Palupalu, Laupa Totuga, Laupa Vea, Laupa Petelo, Laupa Tauaga, Laupa Kose, Laupa Malala, Laupa Etuale, Laupa Uli.
    O i latou sa nofoia le suafa Laupa, e e oo mai i lenei taimi e pei ona ia nei Laupa Malala, Laupa Etuale, ma Laupa Uli, ma o suli uma
    o le suafa Laupa.
    E toe faaauaua atu i se taimi .

    Reply
  4. Lealali Niko

    SULI O LAUPA TOTUGA I FALEULA.
    O Laupa Totuga,na usu i le afafine o Sua i Salelavalu, ona faee ai lea o le gafa o Tufa ma le teine o Taulalo.
    O Tufa na suafa i le suafa Feepo i Faleula. Na usu Feepo Tufa i le alo o Fenunuti i Faleseela i Lefaga , faaee le gafa o Fea’ii le tama ma Pina le teine. Ona toe usu lea o Feepo Tufa ia Safotu le alo o Mutimuti i Samatau, faaee le gafa o le tamaitai o Lesina.
    Ona toe usu lea o Feepo Tufa ia Tusialei le alo o Tofa i Saipipi, faaee le gafa o Samuelu. (Tamafai)
    O Tautai Lealali Niko, o suli mai ia Lesina le alo o Feepo Tufa le atalii o Laupa Totuga, ma Vaivaimalemalo Reupena.

    Reply
  5. FAAMAU nIKO tAUTAIOLEFUE

    Faalupega o Samamea
    Fagaloa District.
    Apia. Samoa.

    Afio mai le Aloalii ma le Ao Mavaega
    Afifio le la Falelua ia Tui ma Salalivao
    Maliu mai Mau’u ma Utaileofe.
    Ma le mamalu o le Faleatua.

    Aloalii Palelei
    Ao Mavaega Puepuemai
    Falelua Tui & Salaivao
    Faleatua Isi matai o le Nuu

    Maota.
    Palelei Manumalupe
    Puepuemai Malae

    Sao Tamaitai.
    Palelei Suluifaleese.
    Puepuemai Vea

    Malaefono Manumalupe

    Reply
  6. Lealali Niko

    MALAE I FOGA’A I FALEULA.

    O Fogaa o le Maota e faasinotonu i le Susuga i le Malietoa.

    O le mafuaaga o le igoa Foga’a, o le Foga’a o le nofoaga o le Fee, e iai lona sootaga ma le Suafa Feepo, i Faleula. O le Fee na fai Atua tapuai lea vaega o le Tuamasaga ma isi veaga o Aana.
    O le upu Fogaa, o papa tetele o loo i lalo o le sami o loo nonofo ai taola tetele poo fee, e mafaia ona latou lolomiina ma faagoto ni vaa faila poo ni alia fagota.
    O le uiga la o le upu Fogaa, O le nofoaga o le Fee.

    Reply

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.