“E le So’oga Ka Oe!” E iai Tulafono o le Pe’a… (pt 2)

O le pese lea e faamatala mai le tala e uiga i le malaga a teine fiti e toalua o la igoa o Taema ma Tilafaiga e le o iloa pe o sa’o o igoa ia aua o isi tagata e fai mai isi igoa ma iai foi isi tala e uiga i tamaitai toalua lea… a’o mo le faamoemoe o lenei faamatalaga ta te faaoga o igoa tausa’afia ma lauiloa o fafine ia o Taema ma Tilafaiga…. ia o fafine ia o le masaga pipii ae ou te talitonu e le taua lenei mea… a’o o fafine foi ia sa malaga mai i laua paopao ma aumai laua ato au poo le ato oloo iai totonu o meafaigaluega e ta ai tatau….. e ta’u o le autapulu ma le autapulu tele ma le ipu lama foi o le ipu vaitusi…. A’o malaga mai le toalua lea ua pepese laua i se pese e uiga i le Tatau… e fai mo se faamatalaga mo tagata Samoa (aua olo’o agai le malaga i Samoa) i le tagata e tatau ona taina ai se pe’a ma le tagata “e le sona ta” Fai mai o upu o le pese… E tata (pau ai le malofie) i fafine ae le Tata o Tane…

Ia ina ua taunu’u le malaga i le Gatai o Falealupo… ua vaai o fafine i se faisua olo’o i lalo le sami ona totofu ai lea o fafine i le fia ai…. a’e ua toe fotua’i mai o fafine ua galo ia te laua le pese… ma ua amata ona pepese sese le laua pese ona faapea… E tata o Tane ae le Tata o Fafine…

Ae le gata iina le tala o fafine toalua lea… e ui lava ina faapea… ua taunu’u laua i le motu o Upolu… ona a’o avatu ai lea le ato au i le Alii suafa ia Su’a o le tua’a o le au Suluape olo’o ta tatau i nei lava onapo… iai isi faamatalaga o Suluape Petelo foi e fai mai na lua tufuga sa tatau na ave ai le ato au… O Su’a i Upolu ma Tulouena i Falealupo Salafai… ona faapea lea le tala o Suluape…

“Saunoa Su’a, i Samoa lava ia, e lua tufuga e pei ona tuuina atu i ai e tamaitai nei le ato au, o Su’a i Upolu ma Tulouena mai Falealupo i Salafai. Fai mai ina ua maea ona afea e tamaitai le aiga o Su’a i Upolu, ona toe malaga lea o teine i Savai’i, ma o la afea ai le aiga o Tulouena i Falealupo, ona matua faasaga ane loa lea o Tulouena ma lona aiga ua fai faaaloaloga e masani ai Samoa i le malaga a tamaitai nei.”

“Ona faapea atu loa lea o tamaitai ia Tulouena, “talofa e, ua leai se mea e tali atu ai lou agalelei mai i le ma malaga, aua o le ato au ua maea ona tuuina atu ia Su’a, ae faapea, o le a falelua ia te ia le Aiga Sa Sua mo le galuega lenei, ma o mea faigaluega uma lava e te mana’omia, alu ia Su’a.””

“Fai mai le mau a Su’a Suluape, o le mafuaaga lena soo se taimi e manaomia ai e Tulouena mea faigaluega mo le galuega, e sau lava ia Su’a avatu ai, e aunoa ma se tala a Su’a faapea e taofi mea faigaluega e aua le avea i se mea, ona e talitonu le falelua o le la aiga, o le la galuega na totofi i ai i laua, e tatau lava ona faatinoina”

O lona uiga… e moni lava le tala lea o fafine toalua ia Taema ma Tilafaiga… aua olo’o molimauina lava tagata i galuega ma feau sa la faia… ma olo’o faaogaina faalupega ma feso’ota’iga o aiga sa aafia i le taunu’uga o le malaga a fafine toalua ia… fa’apea foi le isi tala o Suluape e uiga i le Fa’alupega o Su’a…

Na taua e Su’a Suluape Petelo, o le tufuga tatau lea a Samoa, lea fo’i o loo faalupe, susu mai Su’a ma le falelua o le aiga Sa Su’a, e ui e tala lasi Samoa e tusa ai o lana tatau, o le mea muamua e ao ona silafia e le atunuu, e le suia ai le taua ma le tulaga ese o le tatau e pei ona i ai i le taimi nei.

O le mea ua faasino atu e a’u lenei fuaiupu… ona fa’ailoa atu o Suluape olo’o nofo i le Suafa o Su’a ma gafa ia le ali’i Su’a fo’i le na maua ai le ato ai mai ia te Taema ma Tilafaiga… O le Su’a lenei e fai mai tala o le vavau le tufuga o Su’a na taina le uluai tatau o le Tamalii o Tuia’ana Tamalelagi… ona so’o ai lea Samoa atoa… Lona uiga O Suluape la e tautala sao aua Suluape e iloa ai le mea moni i lenei tala vavau… Ua fetalai mai foi le Susuga o Suluape ina ua sailiili atu atili ua maua ia te ia nai upu tuai ua leva na leiloa… O le ato au na aumaia le au fafine e le o le uluai ato au o Samoa lea… A’e fai mai tala o le isi Su’a (Paulo) na maua ia te ia tala e fetala’i mai i aso anamua sa iai le Ali’i Suafa ia Ouva’a, Fai mai o Ouva’a la lea e le gata i le uluai sogaimiti a’o le uluai tufuga ta tatau foi…. E talafeagai foi ma le isi upu a le Susuga Suluape Petelo ua fetalai mai…

( ua saunoa i le taunuuga o le au uso fafine)

“Peitai o le talitonuga a le Aiga Sa Su’a, e lata mai le taimi na tula’i mai ai tamaitai nei, ae o le ato au ma lona oo mai i Samoa, na aumai e tagata na ulua’i nofoia le atu Samoa,” o se saunoaga lea a le susuga Su’a.”

“Sa ia taua, e faaaloalogia tulaga o tala tuu a Samoa, peitai e manino lava le tulaga o le ato au ma lona taunuu mai i Samoa, aua sa i ai le taimi na umi ai e le’i toe faaaogaina le ato au, ina ua tau leai ni tagata Samoa e fiafia i lenei laei, o le ala lea na toe aumaia ai loa e tamaita’i nei le ato au ma tuuina atu ia Su’a.”

Masalo ua sa’o foi tagata anamua ua tigaina tele lenei faagatama faatamatane… Peitai lea ua toe fia laei ai tagata samoa i le tatau i aso fa’aneionapo…

Lea ua malamalama Tatou i talatu’u ma le talafa’asolopito o le Tatau Samoa… ona tatou agai atu lea i teuga o le tatau ma o latou uiga ta’itasi…

LINK TO PART III

The following two tabs change content below.
Known offline as Lillian (Lils, Lei'a) Arp, Hamo Geek Girl is just learning what it means to be Samoan. When she's not here, she's over at Manaui: Savour Oceania mostly talking about her other favourite topic: Food!

Published by

hamogeekgirl

Known offline as Lillian (Lils, Lei'a) Arp, Hamo Geek Girl is just learning what it means to be Samoan. When she's not here, she's over at Manaui: Savour Oceania mostly talking about her other favourite topic: Food!

2 thoughts on ““E le So’oga Ka Oe!” E iai Tulafono o le Pe’a… (pt 2)”

Leave a Reply

Your email address will not be published. Required fields are marked *