O le isi mea taua ona iloa e sogaimiti o feau fa’asamoa… e le gata i feau faaletino ae tatau ona lelei lana tautala ma tautua mo le Aiga ma le Matai… manatua oe e tatau ona alu le pula’u e tautua i le matai ae le’i ta sona tatau….

o Sogaimiti uma o outou matafaioi e faapenei…

O le Sogaimiti e tatau ona iloa Tapenaga o le Umu ma Faiga o Mea’ai o Samoa
E tatau ona iloa foi afifiina le Taufolo o ali’i ma olo le Fa’ausi
O le sogaimiti e tatau ona iloa Fa’amama le Pua’a poo Fa’aSamoa le Manufata
E Tatau ona iloa le Sogaimiti gasese ma afifi le ofu o le Pua’a
E tatau ona iloa foi le Sogaimiti Pena le Pua’a pe a vela
E tatau ona iloa le Sogaimiti fai le faiai Fe’e ma le Faiai Pusi… tainane foi le faiai Tuna ma ana penaga ma tufaaga e tatau ona avatu i matai ma tulafale eseese
E Tatau ona iloa le Sogaimiti Penaga o le I’a mai Moana (o le atu) ma le I’a Sa (O le Laumei)
E tatau ona iloa le Sogaimiti aga ma tu e tatau i le vafealoai o Samoa
E tatau ona iloa le Sogaimiti aga ma tu e tatau atoa ma faiga o feau i totonu o Maota o Ali’i ma Laoa o Tulafale
E tatau ona Faaaloalo le sogaimiti le vafealoai olo’o aoga i totonu o Aiga o Samoa… pei o le va o le tuagane ma le tuafafine…
E tatau ona auai le Sogaimiti i so’o se faalavelave e lavea ai lona aiga ma tautua mo le aiga ma fesoasoani i le taliga o malo ma Paolo
E tatau ona auai le Sogaimiti i le Aumaga ma so’o se galuega latou te feagai ai i totonu o le Nu’u
O le Sogaimiti E tatau ona Poto Tautala ma Tomai i le Gagana Fa’aloalo ma le Gagana Fa’amatai
O le Sogaimiti E Tatau ona Poto i Fa’alupega o Nu’u uma o Samoa atoa ma latou uiga
O le Sogaimiti E tatau ona Poto i Muagagana ma Alagaupu Fa’asamoa Atoa ma tala vavau ma talafa’asolopito o Suafa ma Papa maualuga o Samoa
O le Sogaimiti E tatau ona Maitau lelei i le aofia o tagata i totonu o se faapotopotoga ia ia lelei o Fa’alupega ma Suafa o Matai Olo’o iai i totonu o le Aofia
O le Sogaimiti E tatau ona iloa pe iai ni upu sa ona ta’u i luma isi matai e pei ona faapea “e le ta’ua le upu o moa i Manu’a; ae fa’aigoa o le manulele, aua olo’o iai le suafa matai o Moa i Manu’a”
O le Sogaimiti E tatau ona faalia ai le lototele ma le lotonu’u taimi uma lava
O le Sogaimiti E tatau ona Tautuina le agatonu a Ali’i
O le Sogaimiti E tatau ona aiuli i le Taupou Pe’a siva… Ma e Tatau ona poto le Sogaimiti i Siva Fa’aSamoa…
O le Sogaimiti E tatau ona poto fatu solo pe a folafola le agatonu
O le Sogaimiti E tatau ona poto fatu solo pe a folafola su’a o ali’i ma ta’i sua foi!

Ia, ou te manatu foi ua le atoa so’u faamatalaga… ae ua le lava se taimi… ua le lava foi a’u ia lol… fai atu foi… Afai iai so’u masei fa’atonu mai faamolemole! o le a tatou o gatasi i le sailiga o le mea moni! e mana’omia lau fesoasoani!

E avatu ai le avanoa tatala mai a’ao fesoasoani mai pe a iai sou tomai i lenei mataupu ou te talia ma le fiafia!!! faatilotilomasae faamolemole! mo le faaleleia o le tomai o le tupulaga a Samoa ma ona Aganu’u…

Ma’Osi Tuipala Tuitele… Maosimaosi@yahoo.com

Auai mai pe a paganoa sau taimi…