Talofa! O a’u o Ma’osi “Ua na o se tuvaoga la’iti’iti lava po’o ni upu tomua, fa’afeiloa’i atu i le mamalu o le ‘aufaitau)

Vae atu le paia o le Maota!
Ou te muamua ona ou fa’atulou…ona ua sopoia le manuvale i le fogatia
Aua e maotua lo’u nofoaga, ae magalo lo’u leo
Lafo ia i fogava’atele
E mua’i ona si’i atu le vi’iga i lo tatou tama oi le lagi! ma momoli atu lenei agaga fa’afetai ona o lenei feso’otaga ua maua ai le avanoa ona fetiaiai ma gafetau soifua… Ma fa’alupe atu i lupe sa va’oeseese lea ua fuifui fa’atasi! Ona o lenei Autu “Samoa ia Fealofani!” Tulouna ia outou paia lasilasi o Samoa Atoa
Tulouna ia paia o Aiga ma latou Tama
Tama ma latou Aiga
Susu mai foi le usoga o Tumua e Tolu ma Pule e Ono
Ituau ma Alataua
Aiga i le Tai ma le Va’a tau o Nafanua… Le Va’a o Fonoti ma le fofoga o le fua!

Tulouna fo’i ia oe le Faleagafulu
le Susu o Sua ma le Vaifanua
Fofo ma Aitulagi
Sa’ole ma le Launiusaelua
Itu’au ma Alataua, Le Ali’i fa’atui o le motu, ma le afioga ia le Ma’oputasi, Aemaise lava oe le Gafatasi!
Tulouna Tama a le Manu’atele
Le Afioga a le La’au na Amotasi
Afioga a Ali’i Fa’atui
Le Mamalu o To’oto’o o le Fale’ula
Ma upu o le Manu’atele
Talofa! Tulouna ia Samoana!!!
Susu mai, Tatala mai a’ao le paia o le tatou aiga fa’aleualesi
Susuga Fa’afeagaia ma faletua
Ali’i ma outou masiofo
Tulafale ma outou tausi
Ta’ita’i Komiti ma ta’ita’ifono
Aemaise nofoalo o Samoa Atoa

Ua ula le tatou aso! Ua futifuti fa’amanuula le tatou taeao fesilafa’i! ma si o ta loto ua sanisani fa’amanuao pe’i o se tautai faatalimaua i le i’a ma so outou lato mai i le tai! aua lenei fa’amoemoe o le feavea’iga o manatu suifefilo’i aua se lumana’i fealofani mo nofo alo o Samoa! ia alofa le atua i le tatou faamoemoe! ma aua le avea matou gagana ma u’amea ta’alili ae ia tumau pea le manino ma le mamalu o le matou gagana Fa’aSamoa!

A tatou ta’ape! ia tatou fa’amavae i le fa’amavaega i le onetai.. le fa’amavaega o Saveasi’uleo ma lona uso ui’i o Ulufanauasese’e… A ta fa’amavae ta te le toe feiloai! ae ta te feiloa’i i i’u o gafa… Ia fa’apena fo’i le tatou fa’amavaega! A fa’apea ta te le toe feiloai i lenei ola… ia tatou toe feiloai i fua o galuega! o tatou fanau ia tupu i se fusi! ia tupu i se ma’umaga! e ui lava ina valavala nofoaga ae tutusa uma sami tatou fagota ai! o lona uiga! poo fea le itu o le lalolagi e te alaala ai ia e iloa o oe o le Samoa! ma ia tatou u’umau le tatou Gagana ma tatou Aganu’u! ia tumau pea le loto malo o Samoa ma le mitamita o ona tagata e o’o lava i lea tupulaga ma lea tupulaga!

Ma’osi Tuipala Tuitele…

The following two tabs change content below.

Leave a Reply

Your email address will not be published. Required fields are marked *